Эм тшӧтш орден

Зэв бур, мый «Парма гор» газетлӧн медводдза лист бокын нимӧдӧны район да предприятие-организацияяс сӧвмӧдысьясӧс. 2008 вося январ 12 лунӧ гижлісны и менам бать Степан Фёдорович Игнатов йылысь. Сэтчӧ пасйӧма, мый бур уджсӧ донъялӧма Трудöвой Гöрд Знамя орденӧн, сетӧма «Коми АССР-лӧн связьса почётной ветеран» ним. Почта вылын дыр уджалӧмысь Помӧсдінын батьӧс тӧдӧны кыдз Почта Степанӧс. Но сылӧн эм и вӧрӧгкӧд тышын повтӧмлунысь мӧд тшупӧда Отечественнöй войналӧн орден. Тамара Николаевна мамöй орденсӧ да медальяссӧ пысалӧма дзоляник юрлӧс вылö да ӧнӧдз на видзӧ. Кор ме волі редакцияӧ да висьталі орден йылысь, тшӧктісны петкӧдлыны удостоверениесӧ. И со неважӧн сійӧ меным сюрис.

Батьӧс война вылö босьтлісны 1943 воын Мыссянь (сэні чужлӧма). Медводз велӧдӧмаӧсь. Буретш сэні салдатъяс кутшӧмкӧ сёянысь отравитчылӧмаӧсь, да батьӧс ӧдва пальӧдӧмаӧсь. Мездӧма Прибалтика. Ранитчӧма да куйлӧма Шауляй карса госпитальын. Бурдӧдӧмаӧсь и передвижнöй госпитальын. Сэсся слаб дзоньвидзалун вӧсна шуӧмаӧсь, мый оз туй строевöй службаӧ. Мӧдӧдӧмаӧсь водительяслӧн курсъяс вылö. Велӧдчӧм бӧрын новлӧдлӧма военнопленнӧйясӧс, выльмӧдӧма туйяс, посъяс. Варшавскöй туй вӧчӧмын эм и батьлӧн пай. 1950 воын бергӧдчис гортас. Вӧлі водительӧн Тимшерса леспромхозын. Сэки Тимшер пырис Помӧсдін районӧ. Помӧсдінса райком корсис бур водительясӧс. Райкомса веськӧдлысь шыӧдчӧма Тимшерса леспромхозöн веськӧдлысь Э.М. Губер дорӧ. Сійӧ и висьталӧма бать йылысь. Но ог пӧ тӧд, кӧсйысяс-ӧ. Сійӧ кадӧ веськӧдлысь кӧ шуис, быть вӧч. И мунӧма. Дзоньталӧма да ловзьӧдӧма киссьӧм техника. Олӧма йӧз пыр на казьтывлӧны сылысь киподтуйсӧ да техника бӧрся бур дӧзьӧрсӧ. Помӧсдін да Кулӧмдін район ӧтувтчӧм да Помӧсдінса райком бырӧм бӧрын бать недыр уджаліс Помӧсдінса леспромхозын, а сэсся пыр водительӧн Коми АССР-лӧн связь управлениеса транспортной контораын, Кулӧмдінса связь узелын, связь автобазаын. Вӧлі зэв кывкутысь мортӧн. Эз лябсьыв, кӧть и дзоньвидзалун вылас тӧдчис отравитчӧм да ранитчӧм. Меным да куим чойлы вӧлі бур да тӧждысьысь батьӧн.

Ёна висис да зэв сьӧкыда куліс 1985 воын. Бӧръя лунъясас сы дорысь эг кежавлӧй. Пыр вӧлім орччӧн. Октябр 18 лунӧ батьлӧн паметь лун. Окота, коді тӧдліс Степан Фёдорович Игнатовӧс, мед миянкӧд тшӧтш казьтылісны.

Николай ИГНАТОВ.

Помӧсдін.

 Парма гор, 2010, Октябр 16 лун (125-126 №).